Изложба на графики од Симона Јакимовска

Во галеријата од ЦК„Марко Цепенков“ е отворена изложба на графики од уметницата Симона Јакимовска, која се претстави со 25 дела.(3 -9.10.2018). Отворањето на изложбата предизвика голем интерес кај посетителите. Особено кај учениците од средните училишта, кои имаа можност на лице место да се запознаат со графиката како техника.

Изложбата ја отвори Викторија Димеска, историчар на уметност која посочи дека графиката денес е една од најмалку истражените техники особено на полето на современиот ументички јазик и развојот на современата технологија.

- Уметницата Јакимовска се претставува со графики и цртежи кои се внимателно креирани во последните неколку години. Творештвото на уметницата проектира апстрактно асоцијативни теми, кои претставуваат нејзин основен и примарен терен на истражување, меѓу кои и се вбројуваат и темите кои се однесуваат на постојаната промена на материјата и духовните состојби изразени преку линијата, точката, кругот, бојата – посочи Димеска.

Симона Јакимовска завршила ФЛУ, отсек графика и досега реализирала неколку самостојни изложби.

Изгубениот свет на сефардските Евреи од западен Балкан

Во изложбениот салон на ЦК„ Марко Цепенков“ денеска (25.9.2018) беше отворена изложбата „Изгубениот свет на сефардските Евреи од западен Балкан„, што Центарот ја реализираше во соработка со Меморијалниот центар на холокаустот на Евреите од Македонија и Центропа.
На отворањето на изложбата зборуваа в.д. директорот на Центарот Менче Караџоска, претставниците од Музејот на холокаустот - Маја Суша и Даниела Штерјова од Центропа.
Беше посочено дека изложбата, чиј куратор е Едвард Серота, директор на Центропа, преку фотографии, текстови, пренесува пет еврејски приказни од Сплит, Дубровник, Белград, Битола и Сараево, а е дизајнирана во 2017 година.

Изложбата на дела „Жена“ од Лидија Саздовскa
„Жена“ е насловот на тематската изложба на дела од Лидија Саздовска, што e отворена (14.9 – 28.9.) во ликовната галерија на ЦК„Марко Цепенков“. Академскиот сликар и ликовен педагог Лидија Саздовска се претставува со 25 -тина дела кои се приказ на нејзиното богатот творештво, создадено во една поширока временска рамка, односно во текот на четири децении. Изложбата ја отвори Викторија Димеска, историчар по уметност.
-Низ годините, како што се развивала, созревала и креирала личноста на уметникот, неуморно следејќи го чекорот на длабоко развиената духовна сетилност и интуитивност, се развивал и уметничкиот сликарски израз. Творештвото на Саздовска е класифицирано во повеќе тематски циклуси. Во секој циклус се воочува постепена промена на ликовната интерпретација на женската фигура и портрет, развиток на структурата на самата композиција, како и функцијата на бојата. Сликарските платна постануваат своевидна интимна приказна, запис, а секој циклус прераснува во мемоар раскажан преку бојата и формата – посочи Викторија Димеска.